शान्तिका अग्रदूत भगवान् गौतम बुद्धको २५७०औँ जन्मजयन्ती पोर्चुगलमा यस वर्ष पनि विशेष कार्यक्रमका साथ भव्य रूपमा मनाइने भएको छ। नेपाली समुदायको सक्रिय सहभागिता रहने यस कार्यक्रममा धार्मिक, सांस्कृतिक तथा आध्यात्मिक गतिविधिहरू समावेश गरिने आयोजकले जनाएका छन्।
नेपाल आदिवासी जनजाति महासङ्घ पोर्चुगलको आयोजनामा आगामी मे १ तारिख शुक्रबारका दिन राजधानी लिस्बनमा बुद्धजयन्ती विशेष रूपमा मनाउने तयारी गरिएको हो। कार्यक्रम लिस्बनको आन्जोस क्षेत्रमा रहेको जिनासीयो क्लबको हलमा आयोजना हुनेछ, जहाँ बिहानैदेखि श्रद्धालुहरूको उपस्थितिमा बुद्धको पूजा–आराधना गरिनेछ।
कार्यक्रमको मुख्य आकर्षणका रूपमा बौद्ध धर्मगुरुद्वारा ध्यान साधना तथा प्रवचनको व्यवस्था गरिएको छ। यसले सहभागीहरूलाई मानसिक शान्ति, आत्मिक सन्तुलन तथा सकारात्मक सोचको विकासमा सहयोग पुर्याउने विश्वास आयोजकको छ। साथै, बुद्धका शान्ति, करुणा र मैत्रीका सन्देशलाई विश्वभर फैलाउने उद्देश्यले विभिन्न सांस्कृतिक प्रस्तुति तथा अन्तरक्रिया कार्यक्रम पनि समावेश गरिने बताइएको छ।
महासङ्घका अध्यक्ष चोपकुमार रानामगरका अनुसार, विदेशमा बसोबास गर्ने नेपालीहरूबीच आपसी एकता, भाइचारा र सांस्कृतिक पहिचानलाई अझ मजबुत बनाउने लक्ष्यसहित यो कार्यक्रम आयोजना गर्न लागिएको हो। उनले बुद्ध जन्मस्थल नेपाललाई अन्तर्राष्ट्रिय स्तरमा थप प्रचार–प्रसार गर्ने अवसरका रूपमा पनि यस कार्यक्रमलाई लिइएको उल्लेख गरे।
उक्त कार्यक्रममा पोर्चुगलमा रहेका विभिन्न नेपाली सङ्घसंस्थाका प्रतिनिधि, बुद्धिजीवी, समाजसेवी तथा सर्वसाधारणको उल्लेखनीय सहभागिता रहने अपेक्षा गरिएको छ। अध्यक्ष रानामगरले सम्पूर्ण पोर्चुगलवासी नेपाली समुदायलाई कार्यक्रममा सहभागी भई बुद्धजयन्तीलाई भव्य र सफल बनाउन आग्रह गरेका छन्।
पोर्चुगलमा प्रत्येक वर्ष नेपाली समुदायको सहकार्य र समन्वयमा बुद्धजयन्ती मनाउने परम्परा रहँदै आएको छ। यसले विदेशमा रहँदा पनि नेपालीहरूले आफ्नो धर्म, संस्कृति र परम्परालाई जोगाउँदै अगाडि बढिरहेको सन्देश दिनुका साथै नयाँ पुस्तामा पनि यसको महत्वबारे जागरण गराउने काम गरिरहेको छ।
यस प्रकारका कार्यक्रमहरूले विश्वभर फैलिएका नेपालीहरूलाई आफ्नो मौलिक पहिचानसँग जोडिराख्न महत्वपूर्ण भूमिका खेल्दै आएको छ। साथै, बुद्धका उपदेशमार्फत विश्व शान्ति र मानव कल्याणको सन्देश प्रवाह गर्ने महत्वपूर्ण माध्यमका रूपमा पनि यस्ता कार्यक्रमलाई लिने गरिएको छ।
