काठमाडौंः वैदेशिक रोजगारीमा आकर्षक तलबको प्रलोभन देखाएर रु ९१ लाख ९० हजार ठगी गरेको आरोपमा दुई जना पक्राउ परेका छन्।
काठमाडौं उपत्यका अपराध अनुसन्धान कार्यालयबाट खटिएको टोलीले बुल्गेरिया पठाइदिने भन्दै रकम असुल गरेको अभियोगमा सल्ल्यान शारदा नगरपालिका–४ का ३२ वर्षीय दीपेन्द्र कुँवर र वनगाड कुपिन्डे नगरपालिका–८ का २४ वर्षीय घने बुढालाई पक्राउ गरेको हो।
कार्यालयका प्रवक्ता रामेश्वर कार्कीका अनुसार उनीहरूले विभिन्न व्यक्तिलाई वैदेशिक रोजगारीको झुटो आश्वासन दिएर ठूलो रकम ठगी गरेका थिए।
पक्राउ परेका दुवै जनालाई थप अनुसन्धान तथा आवश्यक कारबाहीका लागि वैदेशिक रोजगार विभागमा पठाइएको प्रहरीले जनाएको छ।
