बहुराष्ट्रिय कम्पनी क्यारेफोरले कुवेत र बहराइनबाट बाहिरिने घोषणा गरेको छ। उक्त कम्पनीमा तल्लोदेखि माथिल्लो तहसम्म उल्लेख्य संख्यामा नेपाली कार्यरत रहेका छन्।
ग्राहकहरूलाई सम्बोधन गर्दै जारी गरिएको एक आधिकारिक विज्ञप्तिमा कम्पनीले बहराइन र कुवेतस्थित आफ्ना स्टोरहरू क्रमशः सेप्टेम्बर १४ र सेप्टेम्बर १६ देखि बन्द हुने जानकारी दिएको छ।
यसअघि कम्पनीले नोभेम्बर २०२४ मा जोर्डनमा र जनवरी २०२५ मा ओमानमा आफ्ना सुपरमार्केट बन्द गरी हाइपरम्याक्स सञ्चालनमा ल्याइसकेको छ।
बहराइन र कुवेतमा पनि यस्तै नयाँ ब्रान्ड हाइपरम्याक्स सुरु हुने अपेक्षा गरिएको छ।
सन् १९९५ देखि मध्यपूर्व, अफ्रिका र एसियाका १२ देशमा क्यारेफोर ब्रान्ड सञ्चालन गर्ने विशेष अधिकार प्राप्त माजिद अल फुतैमले २०२४ मा निश्चित देशहरूबाट क्यारेफोर हटाउँदै हाइपरम्याक्स ब्रान्डको सुरुवात गरेको हो।
