काठमाडौं– इजरायलको दीर्घकालीन स्याहार केन्द्र (केयरगिभर) मा रोजगारीका लागि आवेदन दिएका उम्मेदवारहरूको कागजात (डकुमेन्ट) प्रमाणीकरण प्रक्रिया तीव्र रूपमा अघि बढाइएको छ। वैदेशिक रोजगार विभागले भाषा परीक्षा उत्तीर्ण उम्मेदवारहरूको आवेदन र आवश्यक कागजात परीक्षण गरिरहेको जनाएको छ।
क्याम्ब्रिज अपस्किल अंग्रेजी भाषा परीक्षामा सहभागी १५ हजार ६ सय २६ जनामध्ये १ हजार २ सय ३१ जना उत्तीर्ण भएका थिए। तीमध्ये आवेदन दिएका उम्मेदवारहरूको शैक्षिक योग्यता, तालिम, अनुभव तथा अन्य आवश्यक कागजातको भेरिफिकेसन भइरहेको विभागका अधिकारीहरूले बताएका छन्।
असार ७ गतेसम्म आवेदन दिएका २ हजार ६ उम्मेदवारमध्ये करिब १ हजार २ सय ३० जना योग्य देखिन सक्ने प्रारम्भिक अनुमान गरिएको छ। इजरायलले योग्य उम्मेदवारलाई छिट्टै माग गर्ने संकेत गरेपछि विभागले डकुमेन्ट परीक्षणको कामलाई तीव्रता दिएको हो।
नेपाल र इजरायल सरकारबीच भएको श्रम सम्झौताअनुसार २ हजार ३ सय नेपाली कामदारको माग गरिएको छ। हाल भाषा परीक्षा उत्तीर्ण उम्मेदवारलाई प्राथमिकतामा राखी पठाउने तयारी भइरहेको छ भने बाँकी माग संख्याबारे निर्णय हुन बाँकी रहेको विभागले जनाएको छ।
