साउन महिनामा करिब ४२ हजार नेपालीले पहिलोपटक वैदेशिक रोजगारीका लागि श्रम स्वीकृति लिएका छन्। वैदेशिक रोजगार विभागको मासिक प्रगति विवरणअनुसार सो महिनामा कुल ७० हजार ४ सय ४१ जनाले विभिन्न प्रकारका श्रम स्वीकृति लिएका हुन्, जसमा नयाँ श्रमिकको संख्या ४१ हजार ८ सय ८९ रहेको छ।
नयाँ श्रमिकमध्ये २९ हजार ४ सय ४७ जनाले म्यानपावर कम्पनीमार्फत श्रम स्वीकृति लिएका छन् भने १२ हजार ४ सय ४२ जनाले व्यक्तिगत रूपमा प्रक्रिया पूरा गरेका छन्।
विभागका अनुसार म्यानपावरमार्फत सबैभन्दा धेरै श्रमिक युएई गएका छन्, जहाँ ९ हजार ३ सय ७५ जना पुगेका छन्। त्यसपछि मलेसियामा ९ हजार १ सय ७०, साउदी अरेबियामा ३ हजार ७ सय ६९, कुवेतमा २ हजार ५ सय ५, कतारमा १ हजार ८ सय २५, साइप्रसमा ८ सय ६४, ओमानमा ८ सय ७, बहराइनमा ३ सय ७, माल्दिभ्स र जोर्डनमा समान २ सय ४२–२ सय ४२, जापानमा २ सय ३७, मौरिससमा ९५, मकाउमा ८ र हङकङमा १ जना गएका छन्।
यस अवधिमा २७ हजार ७ सय ४८ जनाले पुनः श्रम स्वीकृति लिएका छन्। त्यस्तै, ‘जिटुजी’ प्रणालीअन्तर्गत दक्षिण कोरिया र इजरायलका लागि ७ सय १२ जनालाई श्रम स्वीकृति प्रदान गरिएको छ।
समग्र तथ्यांक हेर्दा साउनमा युएई सबैभन्दा ठूलो श्रम गन्तव्य बनेको छ, जहाँ १८ हजार ७ सय ८४ जनाले श्रम स्वीकृति लिएका छन्। त्यसपछि मलेसियामा १२ हजार ४ सय ९८, कतारमा १० हजार ३ सय ६० र साउदी अरेबियामा ८ हजार ६ सय १३ जना रहेका छन्।
व्यवसायीहरूका अनुसार युरोपेली मुलुकहरूमा मागपत्र प्रमाणीकरण प्रक्रिया सहज नहुँदा नेपाली श्रमिक अझै खाडी मुलुक र मलेसियामा निर्भर हुन बाध्य छन्। उनीहरूले कम तलब र जोखिमयुक्त गन्तव्यबाट विकल्प खोज्न सरकारले ठोस पहल नगरेको भन्दै असन्तुष्टि व्यक्त गरेका छन्।
