वैदेशिक रोजगारका गल्ती सच्याउने अवसरमा व्यवसायीहरूको जोड
वैदेशिक रोजगार व्यवसायीहरूले जेनजी पुस्ताको आन्दोलनपछि बनेको अन्तरिम सरकारले वैदेशिक रोजगार क्षेत्रलाई व्यवस्थित र सुधार गर्ने ऐतिहासिक अवसर पाएको बताएका छन्।
व्यवसायीहरूले विगतका गलत निर्णय सच्याउँदै श्रमिकमैत्री नीति, न्यायपूर्ण सेवा शुल्क, पारदर्शी प्रक्रिया र नयाँ श्रम गन्तव्य पहिचान गर्नुपर्नेमा जोड दिएका छन्। हाल विप्रेषण आप्रवाह १७ खर्बभन्दा बढी पुगेर नेपाली अर्थतन्त्रलाई धानेको भए पनि श्रमिकको अधिकार र सुरक्षित वैदेशिक रोजगारी सुनिश्चित गर्न सुधार अपरिहार्य भएको उनीहरूको भनाइ छ।
नेपाल वैदेशिक रोजगार व्यवसायी संघका अध्यक्ष भुवनसिंह गुरुङलगायत नेताहरूले श्रमिक अधिकार सुनिश्चितता, जापान र युरोपेली मुलुकमा मागपत्र प्रमाणीकरण सहज बनाउने, व्यवसायीमैत्री वातावरण सिर्जना गर्ने र भ्रष्टाचारमुक्त प्रशासन कायम गर्न सरकारलाई आग्रह गरेका छन्।
व्यवसायीहरूले अस्वस्थ प्रतिस्पर्धा अन्त्य, अव्यावहारिक ऐन संशोधन, लागत निर्धारण र सेवा शुल्क व्यवस्थापन, मागपत्र प्रमाणीकरणमा सहजीकरण, गैरव्यवसायीको संलग्नता रोक्ने र श्रमिकलाई सुरक्षित, पारदर्शी तथा मर्यादित वातावरणमा पठाउने व्यवस्था गर्नुपर्ने सुझाव दिएका छन्।
