युएई एजेन्ट भन्छन् – ‘हजारौंलाई सजिलै भिजिट भिसामा ल्याएँ’

काठमाडौँ । भिजिट भिसामा युएई लगेर मासिक ६० हजार तलबमा काम लगाईदिने प्रलोभनमा धादिङकि एक महिलाले साढे तीन लाख रकम शोभाकान्ता ढकाललाई बुझाइन् । शोभाकान्ता ढकाल युएई बसेर भिजिट भिसाको धन्दा चलाउने चितवन राप्ति ८ स्थायी घर भएका दिपक ढकालकि श्रीमती हुन् । दिपककै निर्देशनमा पीडितले शोभाको खातामा रकम जम्मा गरेकी हुन् ।

पीडित महिला कसैको चिनजानको माध्यमबाट भिजिट भिसा धन्दाका नाइके एजेन्ट दिपक ढकालको व्हाट्सएप सम्पर्कमा पुगेकी थिईन् । व्हाट्सएपबाट कुरा हुँदै जाँदा सहजै युएईमा रोजगारमा लगाईदिने प्रलोभनमा आफू परेको पीडित बताउँछिन् । उनि आफू जाने तयारी हुँदै गर्दा उनी ढकालको प्रलोभनमा गएका अरु महिला पीडित बनेको खबर पाएपछि युएई नजाने मनस्थिति बनाएको बताउँछिन् । तर उनको तीन लाख ५० हजार रकम फसिसकेको छ । पीडितसँग ग्लोबल आइएमई बैंक मार्फत शोभाकान्ता ढकाललाई रकम डिपोजिट गरेको प्रमाण सुरक्षित राखेकी छन् ।

साथै पीडित र एजेन्टबीच भएको कुराकानीको प्रमाण समेत छ । भिजिट भिसामा लगेर काममा लगाईदिन्छु भन्ने एजेन्ट ढकालले पीडितलाई पैसा अशुली अघि प्रलोभन देखाउँदै भनेका छन् ‘ढुक्क हुनु मासिक ६०/६५ हजार तलब नाचेर, हासेर कमाई गर्नुहुन्छ । ६० हजार हासी-हासी कमाई हुन्छ ।’