मलेसियास्थित नेपाली दूतावासका काउन्सिलर श्रम कृष्णप्रसाद भुसालले मलेसियामा कार्यरत केही नेपाली कामदारको अवस्था कुवेतको भन्दा फरक नरहेको बताएका छन् ।
गोप्य रूपमा घरेलु मदिरा उत्पादन र सेवन गर्ने, पैसा बचाउने नाममा कमसल गुणस्तरको मादक पदार्थको खोजी गर्दा हानिकारक र विषाक्त रक्सी सेवन गर्ने गरेको रिपोर्ट दूतावासमा आइरहेको उनले बताए ।
उनले भने, ‘कतिपय नेपाली दाजुभाइ ह्वास ह्वास गन्हाउँदै दूतावासमा आउने गरेकोे पनि पाइएको छ । सचेत हुनुभएन र समयमै कुलत त्याग्नुभएन भने हातमा भएको जागिर र स्वास्थ्य गुमाएर घर फर्किनुपर्नेछ । परिवारले ठुलो आस राखेका छन्, त्यसैले कुवेतको दर्दनाक घटनाबाट शिक्षा लिएर मदिराको लतबाट टाढा बस्न दूतावासको आग्रह छ ।’
कुवेतमा दुई साताअघि भएको विषाक्त मदिरा सेवन गर्दा १६ नेपालीसहित २३ जनाको मृत्यु र १ सय ६० जना बिरामी भएका थिए । कुवेती सञ्चारमाध्यमहरूले अवैध मदिरा कारोबारका मुख्य कारोबारी मानिएका ४ जनालाई मृत्युदण्डको सजाय हुनसक्ने आंकलन गरेका छन् ।
कुवेतको गृह मन्त्रालयले विषाक्त मदिरा सेवनपछि अस्पतालमा भर्ना भएका सबै विदेशीलाई उपचारपछि देश निकाला गर्ने बताएको छ । देश निकालामा पर्नेमा कम्तीमा ३५ जना नेपाली कामदार रहेकोे बताइएको छ ।
