नेपाल शैक्षिक परामर्श सेवा संघ (नेक्सा) स्थापना : धुम्बाराहीमा भव्य समारोहका बीच उद्घाटन

काठमाडौं ।
विदेश अध्ययनका लागि नेपाली विद्यार्थीलाई परामर्श प्रदान गर्दै आएका व्यवसायीहरूको लामो प्रतीक्षापछि नेपाल शैक्षिक परामर्श सेवा संघ (नेक्सा) को स्थापना गरिएको छ। शुक्रबार धुम्बाराहीस्थित होटेल स्मार्टमा भव्य समारोह आयोजना गरी संघको औपचारिक उद्घाटन गरिएको हो।

साझा संस्थाको आवश्यकता

शैक्षिक परामर्श व्यवसायीहरूका समस्या सम्बोधन गर्ने साझा संस्थाको अभाव रहेको भन्दै त्यसको अभिभावकत्व लिन र व्यवसायलाई मर्यादित र व्यवस्थित बनाउन नेक्सा गठन गरिएको हो।

संघका नवनिर्वाचित अध्यक्ष सन्तोष खनाल को सभापतित्वमा सम्पन्न उद्घाटन कार्यक्रममा संसद्को शिक्षा, स्वास्थ्य तथा सूचना प्रविधि समितिका सभापति अम्मर बहादुर थापा प्रमुख अतिथिका रूपमा उपस्थित थिए। कार्यक्रममा चर्चित हास्य कलाकार मनोज गजुरेल को विशेष प्रस्तुति रहेकोले कार्यक्रम झनै मनोरञ्जनात्मक र अर्थपूर्ण बनेको थियो।

उद्घाटनमा करिब १०० व्यवसायीको सहभागिता

कार्यक्रममा विभिन्न विदेशी शैक्षिक संस्थाका प्रतिनिधिहरू, भाषा परीक्षा प्रदायकका प्रतिनिधिहरू तथा शिक्षासँग सरोकार राख्ने विभिन्न क्षेत्रका प्रतिष्ठित व्यक्तित्वहरूको उपस्थिति थियो। नेक्सामा आबद्ध करिब १०० जना शैक्षिक परामर्श व्यवसायीहरू पनि उपस्थित थिए।

वक्ताहरूका धारणा

नेक्साका वरिष्ठ उपाध्यक्ष आशिष कुँवर ले उद्घाटन केवल नयाँ संस्था जन्मनु मात्र नभई नेपालको शैक्षिक भविष्यमा नयाँ अध्यायको सुरुवात भएको बताए। अन्तर्राष्ट्रिय शिक्षा प्रवर्द्धन गर्दै उच्च व्यावसायिक मापदण्डमा काम गर्नेमा संघ प्रतिबद्ध रहने उनले स्पष्ट पारे।

प्रमुख अतिथि थापाले विदेश अध्ययन गर्नु नकारात्मक नभए पनि विद्यार्थीहरूले सीप र ज्ञान आर्जन गरी नेपाल फर्किएर देशको सेवा गर्नुपर्नेमा जोड दिए। उनले भने, “युरोप र अमेरिका जाने एनओसी बन्द गर्नुपर्छ, छात्रवृत्तिमा जाने विद्यार्थीलाई मात्र अनुमति दिनुपर्छ भन्ने मेरो धारणा हो।”
थापाले शिक्षामा स्वार्थी राजनीति घुसपैठ भइरहेको भन्दै सुधारका लागि अब शिक्षा क्षेत्रमा राजनीति गर्नेहरूलाई बहिष्कार गर्नुपर्नेमा जोड दिए।

सम्मान तथा प्रमाणपत्र वितरण

समारोहमा प्रमुख अतिथिको हातबाट नवनिर्वाचित कार्यसमितिलाई प्रमाणपत्र प्रदान गरिएको थियो। साथै, मात्र एजुकेशन का सम्पादक रमेश लामिछाने लाई सञ्चारकर्मी सम्मान, कानुनी सल्लाहकार सुदिप अर्याल र सदस्य प्रवीण आचार्य लाई विशेष सम्मान दिइएको थियो।
उपस्थित सबै अतिथिलाई मायाको चिनो सहित सम्मान गरिएको थियो।

भावी योजना

अध्यक्ष खनालले परामर्श व्यवसायीहरूको समस्या समाधान र विद्यार्थी हितलाई प्राथमिकता दिने गरी संघ अगाडि बढ्ने बताएका छन्। उनका अनुसार, नेक्साले अबको एक महिनाभित्र नै नेपालकै पहिलो ‘कोरियन एजुकेसन फेयर’ आयोजना गर्ने तयारी गरेको छ।

संघले पारदर्शी, इमानदार र गुणस्तरीय परामर्श सेवा प्रवर्द्धन गर्दै विद्यार्थीमैत्री वातावरण सिर्जना गर्ने, सदस्यहरूको क्षमता विकास गर्ने र अन्तर्राष्ट्रिय अवसरका ढोका अझ फराकिलो बनाउने उद्देश्य लिएको छ।

निष्कर्ष

उद्घाटन समारोहले नेक्साको जन्मलाई मात्र होइन, नेपालको शैक्षिक भविष्यलाई नयाँ दिशामा लैजाने प्रतिबद्धताको घोषणापत्रसमेत प्रस्तुत गरेको छ। वक्ताहरूले नेक्साको सफलताको शुभकामना दिंदै यसले शैक्षिक परामर्श व्यवसायलाई पारदर्शी, व्यवस्थित र मर्यादित बनाउन महत्त्वपूर्ण योगदान गर्ने अपेक्षा व्यक्त गरे।