पछिल्लो महिना माघमा ७० हजारभन्दा बढी नेपालीले वैदेशिक रोजगारीमा जान श्रम स्वीकृति लिएका छन्। वैदेशिक रोजगार विभाग का अनुसार माघ महिनामा कुल ७० हजार ५ सय ३ जनाले श्रम स्वीकृति (पुनः श्रम स्वीकृतिसहित) प्राप्त गरेका हुन्।
श्रम स्वीकृति लिनेहरूमध्ये ६२ हजार १ सय ६२ जना पुरुष र ८ हजार ३ सय ४१ जना महिला रहेका छन्। पहिलो पटक श्रम स्वीकृति लिनेको संख्या भने ३७ हजार ८ सय १२ रहेको छ, जसमा ३२ हजार ८ सय ७४ पुरुष र ४ हजार ९ सय ३८ महिला छन्।
विभागको तथ्यांकअनुसार माघमा सबैभन्दा बढी नेपाली युनाइटेड अरब इमिरेट्स (यूएई) गएका छन्। यूएईका लागि १५ हजार १ सय ३७ जनाले श्रम स्वीकृति लिएका छन्।
त्यसपछि साउदी अरेबिया का लागि ११ हजार ५ सय ९२, कतार का लागि ११ हजार ५ सय ८०, मलेसिया का लागि १० हजार ३ सय ४१, कुवेत का लागि ५ हजार ४ सय ४३ र रोमानिया का लागि ३ हजार ९ सय ४० जनाले श्रम स्वीकृति लिएका छन्।
यसैगरी जापान का लागि १ हजार ७ सय ६०, साइप्रस का लागि १ हजार २ सय ५५, ओमान का लागि १ हजार २ सय ५ र बहराइन का लागि १ हजार १ सय २७ जनाले श्रम स्वीकृति लिएका छन्।
चालु आर्थिक वर्ष २०८२/८३ को साउनदेखि माघसम्मको ७ महिनामा कुल ६ लाख ६१ हजार २ सय २१ जना नेपाली वैदेशिक रोजगारीमा गएको विभागले जनाएको छ। तीमध्ये ५ लाख ७६ हजार ५ सय १२ जना पुरुष र ८४ हजार ७ सय ९ जना महिला रहेका छन्।
