काठमाडौं : दक्षिण कोरियाको सियोलस्थित नेपाली दूतावासले उच्च शिक्षा अध्ययनका लागि दक्षिण कोरिया जाने तयारीमा रहेका नेपाली विद्यार्थीहरूलाई ठगी गर्ने घटनाबारे सचेत गराएको छ। नेपालस्थित केही शैक्षिक परामर्शदाताहरूले भिसा कोड वा ‘कोड भिसा’ नाममा विद्यार्थीहरूबाट अत्यधिक रकम असुल्ने गरेको पाइएको छ।
दूतावासका अनुसार, केही परामर्शदाताहरूले भिसा कोडको लागि रकम नतिरेमा कोरियाको भिसा नलगाइदिने वा प्राप्त भएको भिसा रद्द गराइदिने धम्कीसमेत दिने गरेको पुष्टि भएको छ। प्राप्त गुनासोका आधारमा दूतावासले जनाएको छ कि केही विद्यार्थी र अभिभावकहरूले तीन हजार अमेरिकी डलरसम्म असुलिएको जानकारी दिएका छन्।
दूतावासले सम्बन्धित दक्षिण कोरियाली निकायसँगको जाँचपछि स्पष्ट पारेको छ कि अन्तर्राष्ट्रिय विद्यार्थीहरूका लागि D-2 र D-4 भिसा शुल्क आधिकारिक रूपमा मात्र ६० अमेरिकी डलर लाग्छ र भिसा कोड वा अन्य कुनै अतिरिक्त शुल्क लाग्दैन।
यसका कारण, दूतावासले शैक्षिक परामर्शदाताहरूलाई गैरकानुनी रूपमा थप रकम असुल्न वा विद्यार्थीहरूलाई धम्की दिन नगर्न स्पष्ट अनुरोध गरेको छ।
त्यसैगरी, अध्ययनका लागि दक्षिण कोरिया जान चाहने विद्यार्थीहरूलाई पनि आफ्नै अनुसन्धान र अध्ययन गरेर मात्र आवेदन प्रक्रिया सुरु गर्न दूतावासले सुझाव दिएको छ। विद्यार्थीहरूले विश्वविद्यालय वा कलेजको अवस्था, कोर्स, शुल्क र अध्यापन माध्यम भाषा जस्ता विषयहरू आफैं बुझेर तयारी गर्नुपर्ने चेतावनी दिइएको छ।
