वैदेशिक रोजगारी व्यवसायीहरूले मलेसियाको रोजगारी व्यवस्थापनको नाममा हुँदै आएको सिन्डिकेट प्रणाली अन्त्य गर्ने सामूहिक प्रतिबद्धता जनाएका छन्। नेपाल वैदेशिक रोजगार व्यवसायी संघद्वारा गठित संघर्ष समितिको आयोजनामा मंगलबार सम्पन्न बृहत् व्यवसायी भेलामा उनीहरूले हातमा कालोपट्टी बाँधेर ‘नो सिन्डिकेट’ व्यानरसहित विरोध प्रदर्शन गर्दै उक्त प्रतिबद्धता जनाएका हुन्।
भेलामा वरिष्ठ व्यवसायी हेमबहादुर गुरुङ, ललितपुर वैदेशिक रोजगार व्यवसायी समाजका अध्यक्ष तथा संघका सल्लाहकार नवराज केसी, संघका सल्लाहकार तथा पूर्वअध्यक्षहरू तिलकबहादुर रानाभाट, राजेन्द्र भण्डारी, हरिबहादुर पाण्डे क्षेत्री, दिलप्रसाद पोखरेल, प्रेमबहादुर कटुवाल, विमल ढकाल, रोहन गुरुङ, नेपाल लोकतान्त्रिक वैदेशिक रोजगार व्यवसायी एसोसिएसनका अध्यक्ष दीपक थापा, प्रगतिशील वैदेशिक रोजगार व्यवसायी मञ्च नेपालका अध्यक्ष जनक रावल, गणतान्त्रिक मञ्चका अध्यक्ष धनलाल जैसी, र वैदेशिक रोजगार व्यवसायी नेवा समाजका अध्यक्ष किसन प्रधानलगायतको उपस्थिति थियो।
त्यस्तै, वैदेशिक रोजगार व्यवसायी तमुधी समाजका अध्यक्ष तीर्थबहादुर गुरुङ, एकीकृत वैदेशिक रोजगार व्यवसायी संस्थाका उपाध्यक्ष बाबुराम खड्का, महिला संघकी उपाध्यक्ष तारा रेग्मी, युवा व्यवसायी संघका अध्यक्ष सुमनराज पाण्डे, व्यवसायी मदनकुमार महत लगायतको पनि सहभागिता रहेको थियो।
संघका अध्यक्ष भुवनसिंह गुरुङले संघको हालको कार्यसमिति सिन्डिकेटविरुद्ध दृढ रूपमा उभिएको बताउँदै, संघको अघिल्लो निर्वाचनको मुख्य एजेन्डा नै सिन्डिकेट अन्त्य रहेको स्मरण गराए। उनले भने, “कसैले जस्तोसुकै शंका गरे पनि अहिलेको कार्यसमिति न त फस्नेछ, न त सिन्डिकेटमा लाग्नेछ।”
उनका अनुसार हाल १,०६२ वैदेशिक रोजगार व्यवसायीमध्ये २४५ व्यवसायीको सिन्डिकेटविरोधी प्रतिबद्धता अझै प्राप्त नभएकाले सबैको प्रतिबद्धता संकलन गरी प्रधानमन्त्री तथा मन्त्रिपरिषद्को कार्यालय र श्रम मन्त्रालयमा बुझाइनेछ।
संघका पूर्वअध्यक्ष विमल ढकालले संघको नेतृत्वमा विभिन्न प्रकारका प्रलोभन आउने भएकाले नेतृत्व सचेत रहनुपर्नेमा जोड दिए। उनले मलेसियाले तोकेको मापदण्ड पूरा गर्न सक्ने व्यवसायीहरूलाई पहिचान गरी संघमा बोलाई सामूहिक प्रतिबद्धता गराए सिन्डिकेटको ढोका नै बन्द हुने सुझाव दिए।
पूर्वअध्यक्ष रोहन गुरुङले मलेसियाले तोकेको १० बुँदे मापदण्डमध्ये नौ बुँदा अघिल्लो वर्ष असारमै तय भइसकेको भन्दै अहिले व्यवसायीबीचको एकता अत्यावश्यक रहेको बताए।
लोकतान्त्रिक एसोसिएसनका अध्यक्ष दीपक थापाले “एक हजारभन्दा बढी व्यवसायीको पेटमा लात हानेर थोरै व्यक्तिले मात्र व्यापार गर्ने प्रवृत्ति” विरुद्ध व्यवसायी एकजुट हुनुपर्ने बताए।
मञ्चका अध्यक्ष जनक रावलले संविधान र कानुनविपरीत सिन्डिकेट ल्याउनेहरूविरुद्ध कडा चेतावनी दिँदै भने, “यदि कसैले एकलौटी गर्न खोजे, तिनका घरघेराउ र सडक प्रदर्शन गरिनेछ।”
गणतान्त्रिक मञ्चका अध्यक्ष धनलाल जैसीले पनि मञ्चमा आबद्ध कुनै व्यवसायी सिन्डिकेटमा संलग्न नहुने बताउँदै, कामदार र व्यवसायीको हितमा एकताबद्ध भएर प्रतिवाद गर्नुपर्ने बताए।
संघका सल्लाहकार हरिबहादुर पाण्डे क्षेत्रीले संघले सिन्डिकेटविरुद्ध खबरदारी गर्नुपर्ने र सम्पूर्ण व्यवसायीले एकताबद्ध साथ दिनुपर्ने बताए।
संघका प्रथम उपाध्यक्ष सुजितकुमार श्रेष्ठले सिन्डिकेटका नाममा केही व्यक्तिले ठुलो रकम उठाएको आरोप लगाउँदै ती रकम तीन दिनभित्र फिर्ता गर्न चेतावनी दिए, “फिर्ता नगरे भौतिक कारबाही सुरु हुनेछ।”
वरिष्ठ व्यवसायी हेम गुरुङले कुनै पनि प्रकारको सिन्डिकेटमा संलग्न नहुने प्रतिबद्धता जनाउँदै भने, “कामदार पठाएको संख्याले होइन, सरकारले दिएको लाइसेन्सले सबै व्यवसायी बराबर हुन्।”
निवर्तमान सचिव कर्णराज कटुवालले विगतमा सिन्डिकेट चलाउने केही व्यक्तिहरू अहिले पनि सक्रिय रहेको दाबी गर्दै उनीहरू सचेत नभए प्रमाणसहित नाम सार्वजनिक गर्ने चेतावनी दिए।
कार्यक्रम सञ्चालन महासचिव महेशकुमार बस्नेतले गरेका थिए भने तृतीय उपाध्यक्ष बैकुण्ठ पौडेलले सिन्डिकेटविरुद्ध कविता वाचन गरेका थिए।
कार्यक्रम संघर्ष समिति संयोजक तथा द्वितीय उपाध्यक्ष देवकुमार खोखालीको अध्यक्षतामा सम्पन्न भएको हो। संयोजक खोखालीले सिन्डिकेटधारीहरू योजनाबद्ध रूपमा सक्रिय भइरहेको उल्लेख गर्दै व्यवसायीहरू अझ सशक्त र एकताबद्ध हुनुपर्नेमा जोड दिए।
Tools
ChatGPT can make mistakes. Check important info. See Cookie Preferences.
